SALMO

Agosto 18, 2014

Deuteronomio 32:18-19.20.21

v18Nalimot sila sa Bato nga nagpakatawo kanila,

ug wala nila hinumdomi ang Dios nga naghatag kanilag kinabuhi.

v19"Nakita kini sa Ginoo

ug tungod sa iyang kasuko gisalikway niya ang iyang mga anak.

v20Ug miingon siya, 'Talikdan ko sila,

ug tan-awon kog unsay modangat kanila

kay sila mga daotang kaliwat, mga anak nga mabudhion.

v21Giaghat nila ang akong kasuko kay ila mang gisimba ang laing dios;

misilaob ang akong kasuko tungod sa ilang mga diosdios.

Busa himoon ko nga mapungot usab sila

inigpili ko sa mga tawo nga dili pa nasod;

hagiton ko ang ilang kasuko

pinaagi sa usa ka nasod nga buangbuang.

UNANG PAGBASA

Agosto 18, 2014
Ezeliel 24:15-24

v15Giingnan na usab ako sa Ginoo, v16"Tawo, sa dili madugay kuhaon ko gikan kanimo, sa usa ka pagpamilok, ang tawo nga gihigugma mo pag-ayo apan kinahanglan nga dili ka magbangotan o mohilak o magpaagas sa imong mga luha. v17Hilak apan ayaw lamang pagkusga. Ayaw ipakita ang imong pagbangotan. Hinuon pagpurong ug pagsapatos ug ayaw taboni ang imong nawong ug ayawg kaon sa kan-onon sa mga nagbangotan."e 
v18Sa pagkabuntag nakigsulti ako sa katawhan ug sa pagkagabii namatay ang akong asawa. Sa pagkasunod buntag gituman ko ang gisugo kanako. v19Ug miingon kanako ang katawhan, "Nganong gibuhat mo man kini?" 

v20Unya giingnan ko sila nga miingon kanako ang Ginoo, v21"Sultihi ang katawhan sa Israel nga ang Ginoong Dios nag-ingon: Ang akong Templo inyong gipasigarbo tungod sa iyang pagkagamhanan; buot ninyo kining makita kanunay ug inyo kining gipakamithi. Apan karon pasipad-an ko kini ug ang inyong mga anak nga nahibilin mamatay sa espada. v22Buhaton ninyo ang akong gipabuhat kang Ezequiel: ayaw taboni ang inyong nawong ug ayaw kamog kaon sa kan-onon sa nagbangotan. v23Pagpurong kamo ug pagsapatos. Ayaw pagsubo o paghilak. Magniwang kamo tungod sa inyong kasal-anan ug mag-agulo ang usag-usa kaninyo. v24Si Ezequiel mahimong usa ka ilhanan alang kaninyo busa buhata ang tanan nga gibuhat niya. Inigkahitabo niini, makaila kamo nga ako mao ang Ginoong Dios. 
v25"Ug tawo, sa adlaw nga kuhaon ko na kanila ang ilang dalangpanan, ang ilang kalipay ug himaya, ang makalipay sa ilang panan-aw ug ang ilang gipakamithi, kuhaon usab lakip ang ilang mga anak. v26Niana unyang adlawa usa ka tawo nga nakaikyas sa kalaglagan moanha kanimo aron pagtaho sa balita. v27Niana unyang adlawa makasulti ka na ngadto sa mga mikagiw ug dili ka na magpabiling amang. Busa mahimo ka nga usa ka ilhanan alang kanila. Unya makaila sila nga ako mao ang Ginoo." 

Ebanghelyo

Agosto 17, 2014
Mateo 15:21-28

Ang Pagsalig sa Usa ka Babaye

v21Unya mibiya si Jesus niadtong dapita ug miadto sa kayutaan duol sa mga siyudad sa Tiro ug sa Sidon. v22Usa ka babaye nga taga-Canaan nga nagpuyo niadtong dapita ang miduol kaniya ug nagpakiluoy, "Ginoo, Anak ni David, kaloy-i intawon ako! Ang akong anak nga babaye giyawaan ug nag-antos pag-ayo."
v23Apan wala motubag si Jesus. Miduol ang iyang mga tinun-an kaniya ug miingon, "Papahawaa siya kay nagsunodsunod siya kanato ug saba kaayo!"
v24Unya mitubag si Jesus, "Gipadala ako ngadto lamang sa nawalang mga karnero sa nasod sa Israel."
v25Apan miduol ang babaye ug miluhod sa atubangan ni Jesus. "Ginoo, tabangi intawon ko!" miingon siya.
v26Si Jesus mitubag, "Dili maayo nga kuhaon ang pagkaon sa mga anak aron ipakaon sa mga iro."
v27Ang babaye mitubag, "Tinuod kana, Ginoo, apan bisan gani ang mga iro makakaon man sa mga mumho nga mahulog gikan sa lamesa sa agalon."
v28Ug si Jesus mitubag kaniya, "Babaye, pagkadako sa imong pagsalig! Matuman ang imong gihangyo." Ug niadto gyod dayong gutloa naayo ang iyang anak.

Ikaduhang Pagbasa

Agosto 17, 2014
Roma 11:13-15.29-32



v13Karon, mahitungod kaninyong mga dili Judio: ipasigarbo ko ang akong buluhaton ingon nga apostol sa mga dili Judio v14aron masina ang akong isigka-Judio ug maluwas ko ang pipila kanila. v15Kon sa dihang gisalikway sila, ang kalibotan napasig-uli ngadto sa Dios, unsa pa kaha kon dawaton sila? Makahatag kinig kinabuhi alang sa mga patay! 

 v29Kay dili gayod mausab ang hunahuna sa Dios labot sa iyang pilion ug panalanginan. v30Kamong mga dili Judio misupil sa Dios kaniadto apan karon gikaluy-an kamo sa Dios tungod kay misupil man ang mga Judio. v31Nahimo karong masinupilon sa Dios ang mga Judio aron ang kaluoy nga inyong nadawat gikan sa Dios madawat usab nila. v32Kay gitugyan sa Dios ang tanang mga tawo nga masinupilon aron ikapakita niya ang iyang kaluoy kanilang tanan. 

Salmo

Agosto 17, 2014
Salmo 67:2-3.5-7

v2aron ang tibuok kalibotan masayod sa imong kabubut-on; 
ug mahibalo ang tanang kanasoran sa kaluwasan nga gikan kanimo. 



v3Daygon ka unta sa katawhan, O Dios, 
daygon ka unta nilang tanan. 

v5Daygon ka unta sa katawhan, O Dios, 

daygon ka unta sa tanang katawhan! 

v6Mihatag ang yuta sa iyang abot; 

gipanalanginan kita sa Dios, nga atong Dios. 

v7Gipanalanginan kita sa Dios; 

pasidunggan unta siya sa tanang katawhan sa tanang dapit. 

Unang Pagbasa

Agosto 17, 2014
Isaias 56:1.6-7



v1Nag-ingon ang Ginoo sa iyang katawhan, 
"Patunhaya ang hustisya ug buhata ang matarong, 
kay sa dili madugay luwason ko na kamo 
ug ipaila ko ang akong katarong. 

v6Ug miingon ang Ginoo ngadto sa mga langyaw nga miduol 
ug nag-alagad ug naghigugma kaniya, 

ug nagtamod sa Adlawng Igpapahulay, 
ug nagtuman sa iyang mga sugo: 

v7"Dad-on ko kamo sa akong balaan nga bukid 
ug lipayon ko kamo didto sa akong Templo. 
Ang inyong mga halad-sinunog ug mga halad-inihaw 
dawaton ko didto sa akong halaran, 
kay ang akong Templo nganlan mag balay-alampoanan alang sa tanang kanasoran." 

Let's Keep Shmita שמיטה (the Sabbatical Year) TOGETHER!