Enero 26, 2014 Santos Nga Ebanghelyo Sumala ni San Mateo 4:12-13

Nagsugod si Jesus sa Iyang Buluhaton didto sa Galilea

(Mar. 1:14-15; Luc. 4:14-15)

v12Sa pagkadungog ni Jesus nga gibilanggo si Juan, mibalik siya sa lalawigan sa Galilea. v13Mibiya siya sa Nazaret ug didto mipuyo sa Capernaum, usa ka lungsod daplin sa Lanaw sa Galilea, sa kayutaan sa Zabulon ug Neftali. v14Sa ingon natuman ang gisulti ni propeta Isaias:
v15"Yuta sa Zabulon ug yuta sa Neftali,
agianan padulong sa dagat, tabok sa Jordan,
Galilea, dapit sa mga dili Judio!
v16Ang mga tawo nga nagpuyo sa kangitngit nakakitag dakong kahayag!
Kanila nga nagpuyo sa mangitngit nga yuta sa kamatayon
midan-ag ang kahayag!"
v17Sukad niadto si Jesus misugod pagwali nga nag-ingon, "Hinulsoli ang inyong mga sala kay hapit na maghari ang Dios!"

Gidapit ni Jesus ang Upat ka Mananagat

(Mar. 1:16-20; Luc. 5:1-11)

v18Samtang naglakaw si Jesus daplin sa Lanaw sa Galilea, nakita niya ang duha ka magsoong mananagat nga namukot: si Simon nga ginganlag Pedro ug si Andres. v19Si Jesus miingon kanila, "Kuyog kamo kanako ug tudloan ko kamo sa pagpanagat ug mga tawo." v20Dihadiha gibiyaan nila ang ilang mga pukot ug mikuyog kaniya.
v21Mipadayon siya paglakaw ug nakita niya ang laing duha ka magsoon, si Santiago ug si Juan nga mga anak ni Sebedeo. Didto sila sa ilang sakayan uban sa ilang amahan, nag-ayo sa ilang mga pukot. Gitawag sila ni Jesus v22ug dihadiha gibiyaan nila ang ilang sakayan ug ang ilang amahan ug mikuyog sila kaniya.

Nagwali ug Nag-ayo si Jesus

(Luc. 6:17-19)

v23Unya gilibot ni Jesus ang tibuok Galilea ug nagtudlo siya sulod sa ilang mga sinagoga, nagwali sa Maayong Balita bahin sa paghari sa Dios ug nag-ayo sa mga masakiton. v24Mikaylap sa tibuok lalawigan sa Siria ang iyang kabantog ug gidala sa mga tawo ngadto kaniya ang tanang nag-antos sa nagkalainlaing mga sakit ug mga balatian: mga giyawaan, mga patulon, mga paralitiko ug giayo ni Jesus silang tanan. v25Misunod kaniya ang daghang mga tawo gikan sa Galilea, sa Decapolis, sa Jerusalem, sa Judea ug tabok sa Jordan.