Enero 29, 2014 Ebanghelyo Sumala sa Pasaysay ni San Marcos 4:1-20

Ang Sambingay mahitungod sa Magpupugas

(Mat. 13:1-9; Luc. 8:4-8)

v1Unya misugod na usab si Jesus sa pagpanudlo didto sa daplin sa Lanaw sa Galilea. Daghan kaayo ang mga tawo nga mialirong kaniya ug tungod niini misakay si Jesus sa usa ka sakayan ug milingkod samtang ang katawhan nagbarog didto sa lapyahan. v2Daghang mga butang ang iyang gitudlo kanila pinaagi sa mga sambingay. Usa sa iyang gitudlo kanila mao kini:
v3"Pamati kamo! May usa ka tawo nga miadto sa uma aron pagpugas. v4Sa iyang pagsabod, may mga binhi nga nahulog sa daplin sa agianan ug miabot ang mga langgam ug gipangtuka kini. v5Ang ubang binhi nahulog sa yuta nga batoon ug tungod kay mabaw ra man ang yuta dali ra kining miturok. v6Apan sa dihang nainitan na pag-ayo sa adlaw ang bag-ong turok, nalawos kini ug kay wala man makagamot pag-ayo, nalaya. v7Ang ubang binhi nahulog sa dapit sa mga tunokong sagbot. Unya mitubo ang mga tunokong sagbot ug milumos sa mga tanom. Tungod niini wala sila makapanguhay. v8Apan may mga binhi nga nahulog sa maayong yuta ug miturok, mitubo ug namunga. May nanguhay ug tag-30, ang uban tag-60 ug ang uban tag-100."
v9Ug unya miingon si Jesus, "Kon duna kamoy dalunggan, pamati!"

Ang Katuyoan sa mga Sambingay

(Mat. 13:10-17; Luc. 8:9-10)

v10Sa nag-inusara na si Jesus, pipila niadtong nakabati sa iyang pagpanudlo miduol kaniya uban sa napulog-duha ka tinun-an ug mihangyo kaniya sa paghatag ug katin-awan niadtong mga sambingay. v11Si Jesus mitubag, "Gipadayag na sa Dios kaninyo ang mga tinago sa iyang Gingharian. Apan alang sa uban nga anaa sa gawas, ang kamatuoran gipadayag ingon nga mga sambingay. v12Tungod niana,
'Bisan ug magtan-aw pa sila, dili sila makakita;
ug bisag mamati sila, dili sila makasabot;
kay tingali unyag mamalik sila sa Dios
ug pasayloon niya sila.' "

Naghatag si Jesus ug Katin-awan sa Sambingay mahitungod sa Magpupugas

(Mat. 13:18-23; Luc. 8:11-15)

v13Unya nangutana si Jesus kanila, "Wala ba ninyo masabti ang sambingay? Nan, unsaon man ninyo pagkasabot sa ubang sambingay? v14Ang gisabod sa magpupugas mao ang mensahe sa Dios. v15Usahay ang binhi nga mao ang mensahe mahulog sa agianan. Sama kini sa mga tawo nga makadungog sa mensahe apan moabot si Satanas ug mosakmit sa mensahe nga gipugas diha kanila. v16Ang nahitabo sa mga binhi nga mahulog sa yutang batoon sama niini: May mga tawo nga makadungog sa mensahe ug modawat dayon niini sa dakong kahinangop. v17Apan dili kini makagamot diha kanila busa dili sila mopadayon. Unya pag-abot sa mga kalisdanan ug mga paglutos tungod sa mensahe, mobiya dayon sila. v18Ang ubang tawo sama sa binhi nga gipugas sa dapit sa mga tunokong sagbot. Mao kini sila ang makadungog sa mensahe v19apan ang mga kabalaka niining kinabuhia, ang gugma sa bahandi ug ang nagkalainlaing matang sa mga pangandoy mopatigbabaw ug molumos sa mensahe busa dili kini makapamunga. v20Apan ang ubang mga tawo sama sa mga binhi nga gipugas sa maayong yuta. Makadungog sila sa mensahe, modawat niini ug mamunga: ang uban 30 ka buok, ang uban 60 ka buok ug ang uban 100 ka buok."