AGOSTO 11, 2013 ANG EBANGHELYO

Mga Bahandi didto sa Langit 

LUKAS 12:32-48

v32"Ayaw kahadlok, gamayng panon! Kay ang inyong Amahan nahimuot sa paghatag kaninyo sa Gingharian. v33Ibaligya ang tanan ninyong katigayonan ug ihatag ang halin ngadto sa mga kabos. Pagsangkap kamog mga puntil nga dili madunot ug tigoma ang inyong mga bahandi didto sa langit. Didto dili gayod kini mokunhod kay walay kawatan nga makahilabot niini o anay nga makakutkot. v34Kay hain gani ang inyong bahandi atua usab didto ang inyong kasingkasing.

v35"Pag-andam kamo sa bisan unsay modangat. Baksig hugot ang inyong mga bisti ug dagkoti ang inyong mga suga v36sama sa mga sulugoon nga naghulat sa pagbalik sa ilang agalon gikan sa kombira sa kasal. Sa dihang moabot ug manuktok ang agalon, ablihan dayon sa mga sulugoon ang pultahan. v37Bulahan kadtong mga sulugoon nga makaplagan sa ilang agalon nga nagtukaw ug nag-andam! Sultihan ko kamo nga magbakos siya, palingkoron niya sila sa kan-anan ug silbihan. v38Ug bulahan sila kon makaplagan niya nga andam bisan kon moabot siya sa tungang gabii o kaadlawon na! v39Ug timan-i kini: kon nahibalo pa ang tagbalay kanus-a moabot ang kawatan, dili gayod siya motugot nga lungkabon sa kawatan ang iyang balay. v40Busa kamo usab kinahanglan mangandam kay ang Anak sa Tawo moabot sa oras nga wala ninyo paabota."
v41Unya miingon si Pedro, "Ginoo, nagsugilon ka ba niining sambingaya alang kanamo lamang o gitumong mo ba kini sa tanan?"
v42Ang Ginoo mitubag, "Kinsa ba diay ang buotan ug maalamon nga sulugoon nga maoy tugyanan sa iyang agalon pagdumala sa panimalay ug paghatag sa ubang mga sulugoon sa ilang bahin sa pagkaon sa husto nga panahon? v43Bulahan kadtong sulugoon nga makaplagan sa iyang agalon nga nagtuman niini sa paghiuli niya. v44Sultihan ko kamo: ang agalon maghimo niadtong maong sulugoon nga tinugyanan sa tanan niyang katigayonan. v45Apan kon kadtong maong sulugoon moingon sa iyang kaugalingon, 'Dugay pa moabot ang akong agalon' ug unya mosugod siya pagpamunal sa kauban niyang mga sulugoon nga lalaki ug babaye ug magpalabig kaon ug inom ug maghuboghubog, v46ug unya mahibalik ang agalon usa niana ka adlaw nga wala paabota sa sulugoon ug sa panahon nga wala niya hibaloi, tagudtaguron siyac sa iyang agalon ug pahiagomon sa gidangatan sa ubang tampalasan nga sulugoon.
v47"Ang sulugoon nga nasayod unsa ang buot ipabuhat kaniya sa iyang agalon apan dili mag-andam ug dili magtuman sa ipabuhat, latoson sa makadaghan. v48Apan ang sulugoon nga wala masayod unsa ang gusto sa iyang agalon unya makabuhat ug butang nga tungod niini angay siyang latoson, silotan sa diyutay nga latos. Ang tawo nga gihatagag daghan, paninglag daghan. Apan ang gihatagag daghan pa gayod, paninglan usab ug mas daghan pa.