Ang Pagkausab sa Panagway ni Jesus
Lucas 9:28-36
v28Mga usa ka semana human si Jesus magsulti niining mga butanga, gidala niya si Pedro, si Juan ug si Santiago ug nanungas sila sa usa ka bungtod aron mag-ampo. v29Samtang nag-ampo siya, nausab ang iyang panagway ug misilaw sa kaputi ang iyang sapot. v30Ug sa kalit mitungha ang duha ka tawo ug nakigsulti kaniya. Sila mao si Moises ug si Elias v31nga mipakita uban sa langitnong himaya ug nakigsulti kang Jesus mahitungod sa iyang kamatayon didto sa Jerusalem. v32Nahikatulog pag-ayo si Pedro ug ang iyang mga kauban apan nahigmata sila ug nakakita sa himaya ni Jesus ug sa duha ka tawo nga nagbarog tupad kaniya. v33Samtang mibiya kang Jesus ang duha ka tawo, miingon si Pedro kaniya, "Magtutudlo, maayo gayod nga ania kita dinhi. Magpabarog kita ug tulo ka tolda: usa alang kanimo, usa alang kang Moises ug usa alang kang Elias." (Sa tinuoray wala siya makasabot sa iyang gipanulti.)
v34Samtang nagsulti pa siya, mitungha ang usa ka panganod ug milandong kanila ug nangahadlok ang mga tinun-an sa diha nga ang panganod mitabon kanila. v35Unya may tingog gikan sa panganod nga miingon, "Kini mao ang akong Anak nga akong gipili. Pamatia ninyo siya."
v36Sa pagkahanaw na sa tingog, si Jesus na lamang ang nahibilin. Wala magsaba ang mga tinun-an mahitungod niining tanan ug niadtong higayona wala silay gisuginlan sa bisan unsang butang nga ilang nakita.
Walang komento:
Mag-post ng isang Komento