AGOSTO 8, 2013 ANG MAAYONG BALITA SA KALUWASAN

Ang Pahayag ni Pedro mahitungod kang Jesus

MATEO 16:13-23

v13Unya miadto si Jesus sa yuta duol sa lungsod sa Cesarea Filipo ug didto nangutana siya sa iyang mga tinun-an, "Sumala sa mga tawo, kinsa man ang Anak sa Tawo?"
v14Sila mitubag, "May nag-ingon nga siya mao si Juan nga Magbubunyag. Ang uban nag-ingon nga siya mao si Elias samtang ang uban nag-ingon nga siya mao si Jeremias o laing propeta."
v15Si Jesus nangutana kanila, "Apan kamo, unsa may inyong ikasulti? Kinsa man ako?"
v16Ug mitubag si Simon Pedro, "Ikaw mao ang Mesiyas, ang Anak sa Dios nga buhi."
v17Giingnan siya ni Jesus, "Bulahan ka gayod, Simon nga anak ni Jonas. Kay kining maong kamatuoran wala moabot kanimo pinaagi sa bisan unsang tawhanong pamaagi. Ang akong Amahan nga atua sa langit mao ang naghatag niini kanimo. v18Busa sultihan ko ikaw: ikaw si Pedro ug ibabaw niining bato tukuron ko ang akong simbahan ug bisan gani ang kamatayon dili gayod makabuntog niini. v19Ihatag ko kanimo ang mga yawi sa Gingharian sa langit: ang imong idili dinhi sa yuta, idili usab didto sa langit. Ug ang imong itugot dinhi sa yuta, itugot usab didto sa langit."
v20Unya gipasidan-an ni Jesus ang iyang mga tinun-an nga dili isaba kang bisan kinsa nga siya mao ang Mesiyas.

Gipasidaan ni Jesus ang Iyang Pag-antos ug Kamatayon

v21Sukad niadtong higayona, giklaro na gyod ni Jesus pagsulti ngadto sa iyang mga tinun-an: "Kinahanglang moadto ako sa Jerusalem aron paantoson pag-ayo sa mga namunoan sa mga Judio ug sa mga pangulong pari ingon man sa mga magtutudlo sa Balaod. Patyon ako nila apan sa ikatulo ka adlaw mabanhaw ako."
v22Tungod niini gidala siya ni Pedro layo sa uban ug giingnan, "Dili unta kana mahitabo kanimo, Ginoo!"
v23Miatubang si Jesus ug miingon kang Pedro, "Pahawa, Satanas! Usa ikaw ka babag sa akong agianan kay ang imong hunahuna, hunahuna sa tawo ug dili sa Dios!"