AGOSTO 15, 2013 EBANGHELYO

Miduaw si Maria kang Elisabet

Lucas 1:39-56

v39Unya nangandam si Maria ug midali pag-adto sa usa ka lungsod sa kabukiran sa Judea. v40Miadto siya sa balay ni Zacarias ug nakighimamat kang Elisabet. v41Sa pagkabati ni Elisabet sa pangomusta ni Maria, milihok ang bata sulod sa iyang tiyan. Unya napuno sa Espiritu Santo si Elisabet v42ug1:42 Jdt. 13:18. misulti sa kusog nga tingog, "Bulahan ka sa tanang mga babaye! Bulahan ang bata nga imong ipanganak! v43Pagkadako sa akong kalipay nga ang inahan sa akong Ginoo miduaw kanako! v44Kay pagkadungog ko gayod sa imong pangomusta, milukso sa kalipay ang bata nga akong gisabak. v45Bulahan ka nga mituo nga matuman gayod ang mensahe sa Ginoo kanimo!"

Ang Awit ni Maria sa Pagdayeg

v46Unya miingon si Maria,
"Nagdayeg sa Ginoo ang akong kalag,
v47ug nagmalipayon ako
diha sa Dios nga akong Manluluwas,
v48tungod kay nahinumdom siya kanako nga iyang ubos nga sulugoon!
Ug sukad karon ang tanang tawo motawag kanakog bulahan,
v49tungod sa mga dagkong butang
nga gihimo kanako sa Gamhanang Dios.
Balaan ang iyang ngalan;
v50nagpakita siyag kaluoy sa tanan nga may kahadlok kaniya
gikan sa usa ka kaliwatan ngadto sa tanang kaliwatan.
v51Gibakyaw niya ang iyang kamot nga gamhanan
ug gipatibulaag ang mga tawo nga mapahitas-on
uban sa tanan nilang laraw.
v52Gipukan niya ang mga hari nga gamhanan
gikan sa ilang mga trono,
ug gituboy ang mga timawa.
v53Gibusog niya sa mga maayong butang ang mga gigutom,
ug iyang gipapahawa nga walay dala ang mga dato.
v54-55Gituman niya ang iyang saad sa atong mga katigulangan.
Mitabang siya kang Israel nga iyang sulugoon
ug nahinumdom siya pagpakitag kaluoy kang Abraham
ug sa tanan niyang mga kaliwat hangtod sa kahangtoran!"
v56Mipuyo si Maria ug mga tulo ka bulan uban kang Elisabet ug unya mipauli sa ila.