AGOSTO 5, 2013 ANG EBANGHELYO KARUN

Gipakaon ni Jesus ang 5,000 ka Tawo

Mateo 14:13-21

v13Sa pagkadungog ni Jesus sa balita nga gipatay si Juan, mibiya siya niadtong dapita sakay sa usa ka sakayan. Nag-inusara siyang miadto sa usa ka dapit nga awaaw. Nakabalita niini ang mga tawo busa namiya sila sa ilang mga lungsod ug nanglakaw sila aron pag-apas kaniya. v14Mikawas si Jesus sa sakayan ug sa pagkakita niya sa dakong pundok sa mga tawo, giabot siyag dakong kaluoy kanila ug giayo niya ang ilang mga masakiton.

v15Sa hapit na mosalop ang adlaw ang iyang mga tinun-an miduol kaniya ug miingon, "Mongitngit na ra ba ug awaaw kining dapita. Maayo tingaling palakton na lang nimo ang mga tawo ug paadtoon sa mga balangay nga duol aron mamalit ug pagkaon alang sa ilang kaugalingon."
v16Si Jesus mitubag, "Dili na kinahanglan nga manglakaw pa sila. Kamo mismo ang maghatag kanilag pagkaon."
v17Sila mitubag, "Lima ra ka pan ug duha ka isda ang ania diri."
v18Si Jesus miingon, "Dad-a ngari." v19Unya iyang gipalingkod sa mga sagbot ang mga tawo ug gikuha niya ang lima ka pan ug ang duha ka isda. Unya mihangad siya sa langit ug nagpasalamat sa Dios. Gipikaspikas niya ang mga pan ug gihatag ngadto sa mga tinun-an nga mao usab ang nanghatag niini ngadto sa mga tawo. v20Nangaon ang tanan ug nangabusog. Unya gihipos sa mga tinun-an ang mga sobra nga nakapuno ug napulog-duha ka bukag. v21Lima ka libo ang gidaghanon sa mga tawo nga nangaon, walay labot sa mga babaye ug sa mga bata.