Giayo ni Jesus ang Usa ka Amang
MATEO 9:32-34
v32Sa pagpanglakaw na sa mga tawo, dihay pipila nga nagdala ngadto kang Jesus ug usa ka tawo nga naamang tungod kay gisudlan kinig yawa. v33Sa nahinginlan na ang yawa, nakasulti ang tawo ug nahibulong ang tanan nga nag-ingon, "Wala pa gayoy nahitabo nga sama niini dinhi sa Israel!" v34Apan miingon ang mga Pariseo, "Ang pangulo sa mga yawa maoy naghatag kaniyag gahom sa pagpagula kanila."
Naluoy si Jesus sa mga Tawo
MATEO 9:35-38
v35Unya gilibot ni Jesus ang tanang kalungsoran ug kabaryohan. Nanudlo siya didto sa ilang mga sinagoga ug giwali niya ang Maayong Balita bahin sa paghari sa Dios. Giayo usab niya ang mga tawo sa tanan nilang balatian ug sakit. v36Sa pagkakita niya sa daghang mga tawo, naluoy siya kanila kay nagluya man sila ug walay kadasig, morag mga karnero nga walay magbalantay. v37Busa giingnan niya ang iyang mga tinun-an, "Daghan ang anihonon apan diyutay ra ang mangangani. v38Busa pag-ampo kamo sa tag-iya sa anihonon aron magpadala siyag dugang pang mangangani."
Walang komento:
Mag-post ng isang Komento