Ang Pangutana mahitungod sa Adlawng Igpapahulay
Mateo 12:1-8
v1Usa niana ka Adlawng Igpapahulay, naglakaw si Jesus ug ang iyang mga tinun-an latas sa kaumahan sa trigo. Gigutom ang iyang mga tinun-an busa nangutlo silag mga uhay sa trigo aron ilang kan-on. v2Sa pagkakita niini sa mga Pariseo, miingon sila kang Jesus, "Tan-awa ra, dili ba supak man sa atong Balaod ang gihimo sa imong mga tinun-an niining Adlawng Igpapahulay?"
v3Si Jesus mitubag, "Wala ba diay kamo makabasa sa gibuhat ni David sa dihang gigutom siya ug ang iyang mga kauban? v4Misulod siya sa balay sa Dios ug siya ug ang iyang mga kauban mikaon sa pan nga gihalad ngadto sa Dios bisag supak sa Balaod nga mangaon sila niadtong pan kay ang mga pari ra man ang gitugotan sa pagkaon niini. v5O wala ba diay kamo makabasa sa Balaod ni Moises, nga sa matag Adlawng Igpapahulay ang mga pari sulod sa Templo nakalapas man sa balaod sa Adlawng Igpapahulay apan wala sila ilha nga nakasala? v6Sultihan ko kamo nga dinhi aniay labaw pa kay sa Templo. v7Kon nakasabot pa lang kamo sa kahulogan niining bahina sa kasulatan nga nag-ingon, 'Kaluoy ang akong gusto, dili mga halad,' dili unta ninyo pakasad-on ang mga tawo nga walay sala. v8Kay ang Anak sa Tawo mao ang magbuot sa angayng buhaton sa Adlawng Igpapahulay."
Walang komento:
Mag-post ng isang Komento