HULYO 7, 2013 EBANGHELYO

Gisugo ni Jesus ang 72 

LUCAS 10:1-12

v1Human niini, nagpili ang Ginoo ug laing 72a ka tawo. Gipadala niya sila sa tinagurha aron mag-una kaniya ngadto sa tagsatagsa ka lungsod ug dapit nga hapit na niyang adtoan. v2Miingon siya kanila, "Ang anihon daghan apan diyutay ra ang mga mangangani. Busa pag-ampo kamo sa tag-iya sa anihon aron magpadala siyag dugang pang mamumuo nga moani niini. v3Lakaw kamo, ako nagpadala kaninyo nga sama sa mga nating karnero taliwala sa mga lobo. v4Ayaw pagdala ug puntil o bag o sandalyas ug ayaw kamo paghunong aron paghimamat kang bisan kinsa diha sa dalan. v5Bisan diing balaya kamo moabot, unaha ninyo pag-ingon, 'Ang panagdait maania niining balaya.' v6Kon didto may nagpuyo nga mahigugmaon sa pakigdait, ibilin kaniya ang inyong panghinaot sa pakigdait. Kon wala, ang inyong panghinaot sa pakigdait mobalik ra kaninyo. v7Pabilin kamo niadtong balaya; kaon ug inom sa ilang idalit kaninyo kay ang mamumuo angay gayod nga suholan. Ayaw pagbalhinbalhin gikan sa usa ka balay ngadto sa lain. v8Kon moadto kamo sa usa ka lungsod ug dawaton kamo nila, kaon sa idalit kaninyo. v9Ayoha ang mga masakiton niadtong lungsora ug ingna ang mga tawo didto nga hapit na moabot kanila ang paghari sa Dios. v10Apan sa dihang moadto kamo sa usa ka lungsod ug dili kamo nila dawaton, gula kamo ngadto sa kadalanan ug ingna ninyo ang mga tawo, v11'Bisan ang abog sa inyong lungsod nga mitapot sa among mga tiil among taktakon agig pasidaan batok kaninyo apan timan-i nga hapit na maghari ang Dios!' v12Sultihan ko kamo nga sa Adlaw sa Paghukom mas grabi pa ang katalagman nga mahiagoman niadtong lungsora kay sa Sodoma!