Ang Sambingay mahitungod sa Maayong Samaryanhon
Lucas 10:25-37
v25Unya miduol ang usa ka magtutudlo sa Balaod aron pagsulay kang Jesus. Nangutana siya, "Magtutudlo, unsay kinahanglan kong buhaton aron ako makadawat sa kinabuhing dayon?"
v26Si Jesus mitubag kaniya, "Unsa may giingon sa Kasulatan? Ug giunsa man nimo kini pagsabot?"
v27Ang magtutudlo sa Balaod mitubag, "'Higugmaa ang Ginoo nga imong Dios sa tibuok mong kasingkasing ug sa tibuok mong kalag ug sa tibuok mong kusog ug sa tibuok mong hunahuna' ug 'Higugmaa ang imong isigkatawo ingon sa paghigugma mo sa imong kaugalingon.'"
v28Mitubag si Jesus, "Husto ang imong tubag! Buhata kana ug makadawat ka sa kinabuhi."
v29Apan gusto sa magtutudlo sa Balaod nga ilhon siyang matarong busa nangutana pa gayod siya kang Jesus, "Kinsa ba diay ang akong isigkatawo?"
v30Si Jesus mitubag, "May usa ka tawo nga milugsong gikan sa Jerusalem ngadto sa Jerico ug gibanhigan siya sa mga tulisan. Gihuboan nila siya, gibun-og ug gibiyaan nga himalatyon. v31Ug nahitabo nga may usa ka pari nga miagi niadtong dalana. Sa pagkakita niya sa tawo nga gitulisan, milabay lamang siya agi sa pikas daplin. v32Unya nahiagi usab ang usa ka Levita. Sa pagkaduol niya, mitan-aw siya sa tawo ug unya misaylo lamang agi sa pikas daplin. v33Apan may usa ka Samaryanhon nga nagpanaw niadtong dalana ug nahiagi sa tawo nga gitulisan. Sa pagkakita niya sa tawo, naluoy siya. v34Miduol siya kaniya ug gibuboan niyag lana ug bino ang iyang mga samad ug gibugkosan. Unya gipasakay niya ang tawo sa iyang hayop ug gihatod ngadto sa usa ka balay abotanan ug didto iyang gialimahan siya. v35Sa pagkaugma mihatag siyag duha ka denarioe ngadto sa tig-atiman sa abotanan ug mitugon, 'Atimana siya ug inigbalik nako dinhi bayran ko ikaw sa imong magasto.'"
v36Ug si Jesus mitapos pag-ingon, "Karon, sa imong hunahuna kinsa man niining tulo ang nagpamatuod nga isigkatawo sa gitulisan?"
v37Ang magtutudlo sa Balaod mitubag, "Kadtong naluoy kaniya." Jesus miingon, "Busa lakaw ug buhata ang sama sa iyang gibuhat."
Walang komento:
Mag-post ng isang Komento