EBANGHELYO

AGOSTO 19, 2014

MATEO 19:23-30

v23Unya miingon si Jesus sa iyang mga tinun-an, "Sultihan ko kamo nga malisod kaayo sa usa ka dato ang pagsulod sa Gingharian sa langit. 

v24Sultihan ko pa kamo: mas lisod pa gayod sa usa ka dato ang pagsulod sa Gingharian sa Dios, kay sa usa ka kamelyo paglusot sa lungag sa dagom."

v25Sa pagkadungog niini sa mga tinun-an nahibulong sila pag-ayo. Busa nangutana sila, "Nan, kinsa ra man diay ang maluwas?"

v26Si Jesus mitutok kanila ug mitubag, "Kini dili mahimo sa tawo; apan mahimo sa Dios ang tanang butang."

v27Unya miingon si Pedro, "Ginoo, among gibiyaan ang tanan ug misunod kami kanimo. Unsa may among mapaabot?"

v28Si Jesus miingon kanila, "Isulti ko kini kaninyo: iniglingkod unya sa Anak sa Tawo sa iyang mahimayaong trono diha sa Bag-ong Kalibotan, kamong napulog-duha ka tinun-an molingkod usab sa mga trono aron paghukom sa napulog-duha ka banay sa Israel. 

v29Ug ang tanan nga mibiyag balay, mga igsoon, amahan, inahan, mga anak, o mga uma tungod kanako makadawat ug labaw sa usa ka gatos ka pilo, ug hatagan pa gayod siyag kinabuhing dayon. 

v30Apan daghan nga karon nag-una maulahi, ug daghan nga karon naulahi mahiuna.