UNANG PAGBASA

AGOSTO 19, 2014
Ezekiel 28:1-10

Ang Silot sa Hari sa Tiro 
v1Nag-ingon ang Ginoo kanako, v2"Tawo, sultihi ang pangulo sa Tiro nga nag-ingon ang Ginoong Dios: 
"Garboso ka ug miingon, 
'Ako usa ka dios ug naglingkod ako sa trono sa mga dios, 
taliwala sa kadagatan.' 
Apan tawo ka lamang ug dili dios, 
bisan tuod nagpakamaalamon ka sama sa usa ka dios. 
v3Nagtuo ka nga mas maalamon ka kay kang Daniel 
ug nga walay butang nga natago gikan kanimo. 
v4Pinaagi sa imong kaalam ug salabotan 
nadato ka ug nakatigom ug daghang bulawan ug plata. 
v5Pinaagi usab sa imong pagkamaayong mamatigayon, misamot kag kadato 
ug tungod niini nagarboso ka. 

v6"Busa ako, ang Ginoong Dios nag-ingon: 
Kay maalamon ka man kaha sama sa usa ka dios, 
v7ipasulong ko ikaw sa mga langyaw, 
sa nasod nga bangis kaayo. 
Gub-on nila ang tanang maanindot nga butang 
nga imong naangkon pinaagi sa imong kaalam. 
v8Itambog ka nila sa kahiladman 
ug mamatay ka taliwala sa kadagatan. 

v9Tan-awon ta kon moingon ka ba lang gihapon, 
'Ako usa ka dios!' diha sa atubangan sa mga mopatay kanimo. 
v10Mamatay ka sama sa dili tinuli 
diha sa kamot sa mga langyaw nga walay kahadlok sa Dios. 
Ako, ang Ginoong Dios maoy naghatag sa mando."